XUBNIHII MAALIYADA UQAABILSANAA ALSHABAAB OO LA DILAY

Dowladda Federaalka Soomaaliya ayaa shaacisay in ay fulisay hawlgallo qorsheysan oo lagu dilay saddex nin oo ka tirsanaa garabka maaliyadda ee kooxda Al-Shabaab.

Hawlgalladan ayaa ka kala dhacay gobollada Shabeellaha Hoose iyo Jubadda Dhexe. Sida lagu sheegay war-saxaafadeedka dowladda, bartilmaameedka hawlgalladu wuxuu ahaa xubno si gaar ah ugu lug lahaa ururinta lacago ay qaadi jirtay Al-Shabaab.

Cabdillaahi Xasan, oo loo yaqaanay Cabdillaahi Wadaad, ayaa lagu dilay hawlgal ka dhacay deegaanka Kuunyo Barrow ee gobolka Jubadda Dhexe. Dowladda ayaa sheegtay in uu mas’uul ka ahaa dhinaca maaliyadda Al-Shabaab, islamarkaana uu ka hawlgali jiray gobollo kala duwan.

Sidoo kale, Axmed Dhubad Xiddig oo loo yaqaanay Aadan Dheere ayaa lagu dilay hawlgal wadajir ah. Hawlgalkaas waxaa fuliyay Ciidanka Nabad-Sugidda iyo Sirdoonka Qaranka (NISA) iyo cutubyo ka tirsan Kumaandooska Soomaaliya. Waxa uu ka dhacay gobolka Shabeellaha Hoose. Aadan Dheere ayaa la sheegay in uu ahaa madaxa maaliyadda Al-Shabaab ee gobolka Banaadir.

Dhanka kale, hawlgal gaar ah ayaa lagu dilay Maxamed Sahal oo loo yaqaanay Abu Usama. Ninkan ayaa la sheegay in uu xilal kala duwan ka soo qabtay Al-Shabaab, oo ay ku jirto waxa ay ugu yeeraan dabagalka maaliyadda. Dowladda ayaa intaas ku dartay in uu ka mid ahaa xubnaha ugu dhow hoggaamiyaha Al-Shabaab, Axmed Diiriye.

Dowladda Federaalka Soomaaliya ayaa sheegtay in hawlgalladan ay qeyb ka yihiin dadaallada lagu wiiqayo awoodda dhaqaale ee Al-Shabaab, si loo yareeyo awoodda ay ku fuliyaan weerarrada iyo howlgallada ay ka geystaan dalka.

Salafia Media